Vorjafndægur

fjallið leggur ljósrauða morgunslá

lauslega yfir kulnaðar herðar sínar

og nokkrir hrafnar fljúga með svartar fínar

fjaðrir og krunka sín á milli um þá

sem kunna að verða á vegi þeirra og tjá

sig værukærir um allar þínar og mínar

vonir og óskir, þann draum sem aldrei dvínar

draum sem hvílir flestum mönnum hjá

er dagar bráðnar frostið í fjallsins hlíð

og fjarlæg birtan sigrar myrkurkulda

hver einasta lífvera leggur sig að ómi

vorsins því lífsneistann vermir betri tíð

og vænlegasta tilverunnar hulda

fræ, það verður að fögru, heilbrigðu blómi

Eyþór Rafn Gissurarson er fæddur 21.03.62 í Reykjavík en ólst upp í

Kópavogi. Hann lauk stúdentsprófi frá máladeild MK 1982 og B.Ed. prófi frá

Kennaraháskóla Íslands 1989.  Eyþór hefur gefið út þrjár ljóðabækur sem

heita Hvítu ský (útgefandi höfundur, 1994), Öldur (útgefandi Pjaxi ehf,

1997) og Raf (útgefandi Pjaxi ehf, 2003). Þessar þrjár bækur eru til á

flestum bókasöfnum Íslands. Ljóðið Vorjafndægur úr Raf var notað í

sjúkraprófi í samræmdu prófi í íslensku fyrir 10. bekk 2004. Eyþór birti

mörg af ljóðum sínum í Lesbók Morgunblaðsins þegar Gísli Sigurðsson var

ritstjóri hennar. Eyþór hefur auk þess birt tvær greinar eftir sig í Lesbók

Morgunblaðsins, önnur er um ljóðskáldið og þýðandann Jón á Bægisá (1997) og

hin um leikrita og ljóðskáldið Jóhann Sigurjónsson (1998).

Eyþór Rafn Gissurarson